ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានចូលរួមក្នុងកិច្ចប្រជុំកំពូលអាស៊ានលើកទី៣៨និង៣៩នៅព្រឹកនេះ។ នេះជាកិច្ចប្រជុំមួយក្នុងកិច្ចប្រជុំជាច្រើនទៀតដែលសម្ដេចនឹងត្រូវចូលរួមចាប់ពីថ្ងៃនេះរហូតដល់ថ្ងៃទី២៨ខែតុលាខាងមុខ។

សម្ដេចតេជោបានសរសេរនៅលើហ្វេសបុកផេករបស់សម្ដេចថា៖ «យើងនឹងមានកិច្ចប្រជុំចំនួន១១ដែលត្រូវប្រើពេល៣ថ្ងៃគឺពីថ្ងៃ២៦ដល់ថ្ងៃ២៨ តុលា ២០២១» ។

យោងតាមសេចក្ដីប្រកាសព័ត៌មានចុះថ្ងៃទី២៥ ខែតុលា ក្រសួងការបរទេសបានឱ្យដឹងថាកិច្ចប្រជុំកំពូលអាស៊ានដែលសម្ដេចនឹងចូលរួមនោះរួមមាន កិច្ចប្រជុំកំពូលអាស៊ានលើកទី៣៨និងលើកទី៣៩ កិច្ចប្រជុំកំពូលអាស៊ាន-សាធារណរដ្ឋកូរ៉េ ចិន សហរដ្ឋអាមេរិក ជប៉ុន អូស្ត្រាលី ឥណ្ឌា រុស្ស៊ី និងកិច្ចប្រជុំកំពូលអាស៊ានបូកបី។

រដ្ឋមន្រ្តីដែលអមសម្ដេចតេជោចូលរួមកិច្ចប្រជុំកំពូលទាំងនេះរួមមាន រដ្ឋមន្ត្រីក្រសួងការបរទេសលោក ប្រាក់ សុខុន រដ្ឋមន្ត្រីក្រសួងពាណិជ្ជកម្មលោក ប៉ាន សូរស័ក្កិ និងរដ្ឋមន្ត្រីក្រសួងអប់រំ យុវជន និងកីឡាលោក ហង់ជួន ណារ៉ុន។

ថ្ងៃចុងក្រោយនៃកិច្ចប្រជុំកំពូលគឺនៅថ្ងៃទី២៨ ខែតុលា ប្រទេសប្រុយណេនឹងប្រគល់ «ញញួរ» តំណាងប្រធានប្ដូរវេនអាស៊ានដល់កម្ពុជា សម្រាប់ដឹកនាំអាស៊ានក្នុងឆ្នាំ២០២២ខាងមុខផងដែរ៕